भारत देस्से देआं राज्जेआं च म्ह़ाचल परदेस इक प्ह़ाड़ी परदेस है , जेहड़ा कि हिमालय दिआ गोदा च बस्सेआ होएआ है। म्ह़ाचले देआं 12 जिह़लेआं च जिह़ले कांगड़े दा अपणा ई बजूद है।
एह़ जिह़ला अपणिआं छैल-छबीले , मनैं जो छूह़णैं बाले़आं नजारेआं ते मत्तेआं बाह़रलेआं लोकां जो अप्पु पास्से खिंजदा है। इसदेआं प्ह़ाड़ा जो ‘ ध़ौलाध़ार ’ देआं प्ह़ाड़ां दे नांऐं ते जाणेआ जांदा है। इसदा खास सैह़र ‘ कांगड़ा ’ है , जिसदा पराणा नां ‘ नगरकोट ’ था , जिसजो बाह़द्दे च ‘ त्रिगर्त ’ भ़ी ग्लांदे थे। एह़त्थु राज्जेआं दे पराणैं किह़ले भ़ी हन। एह़त्थु देआं लोकां दी भ़ासा ‘ कांगड़ी ’ है। एह़ भ़ासा कांगड़ा जिह़ले नैं लगदे जिह़ले म्ह़ीरपुर , चंबा , ऊना , मंड़ी कने बिलासपुरे च भ़ी बोली जांदी है। जे असां गल्ल करिए इस जिह़ले दिआं बोलिआं दी ता एह़त्थु गद्दी , नूरपुरी , भटिआती बोलिआं भ़ी गल्लाई जांदिआं हन। एह़त्थु दे लोक हिन्दिआ ते लाबा थोह़ड़ी-थोह़ड़ी अंग्रेजी भी ग्लांदे हन। सन 2012 दिआ जनगणना दे मताबक कांगड़े दी अबाद्दी 15,07,223 है , जिसा च 4,20,864 लोक ग्रांआं च , कने 86,359 सैह़रां च रैंहदे हन। इसदिआं 16 तह़सीलां कने 9 उप तह़सीलां हन। एह़त्थु दी एकता , भाईचारा ई असां दी ख़ास पच्छान है।
